Eyvazov İslam Həsən oğlu 1999-cu ildə Naxçıvan şəhərində anadan olub. 2006-2015-ci illərdə Naxçıvan şəhər 15 saylı tam orta məktəbdə 9 illik təhsil alıb. Təhsil müddətində həm də 7 il Ərtoğrul Cavid adına musiqi məktəbinin fortepiano ixtisası üzrə dərs alıb. 9-cu sinfi bitirdikdən sonra Naxçıvan şəhər hərbi liseyinə sənəd verib, lakin qəbul olunmayıb.
İslam 2017-ci ildə həqiqi hərbi xidmətə yola düşüb. Xidmətini bitirdikdən sonra 2020-ci ildə yenidən hərbə qayıdıb, bu dəfə MAXE kimi fəaliyyətini davam etdirib. N saylı hərbi hissədə kəşfiyyatçı kimi xidmətə başlayan İslam Eyvazov 2 ay sonra vətənini qorumaq üçün ön cəbhəyə göndərilib. Cəbrayıl, Füzuli, Xocavənd istiqamətlərində vuruşub. Noyabrın 9-da Xocavənddə şəhid olub. Şəhidimiz Qaraxanbəyli kənd məzarlığında dəfn edilib.
Azərbaycan Prezidenti İlham Əliyevin Sərəncamına əsasən şəhid İslam Eyvazov ölümündən sonra "Vətən uğrunda" və "Xocavəndin azad olunmasına görə" medalları ilə təltif edilib.
