Röyan Sübhan oğlu Hüseynov 2001-ci ilin 21 mart tarixində Azərbaycan Respublikasının Gədəbəy rayonunun Parakənd kəndində anadan olub. 2007-ci ildə Gəncə şəhərində yerləşən Nigar Rəfibəyli adına 43 nömrəli tam orta məktəbdə təhsil almağa başlayıb. Eyni zamanda hələ uşaq yaşlarından cüdoya olan marağından bu idman növündə böyük səylər göstərib, bir neçə uğurlara imza atıb. Peşəkar olaraq Gəncə İdman klubunun idmançısı olmuş Röyan Hüseynov dəfələrlə zona və Respublika birincisi olub.
24 aprel 2019-cu ildə Röyan müddətli hərbi xidmətə yollanıb. Xidmətin bitməsinə 3 gün qalmış, 27 sentyabr 2020-ci ildə İkinci Qarabağ müharibəsi başlayıb və əsgər Hüseynov müxtəlif istiqamətlərdə döyüşlərə qatılıb. 2020-ci ilin 10 oktyabr tarixində Xocavənd rayonunun Hadrut qəsəbəsinin azad edilməsi uğrunda döyüşlər zamanı düşmən snapyerinin atəşi nəticəsində şəhid olub . 11 oktyabr tarixində nəşi ailəsinə təhvil verilib və böyük izdihamla Gəncə Şəhidlər Xiyabanında dəfn edilib.
Ölümündən sonra Röyan Hüseynov «Vətən uğrunda», «Cəsur döyüşçü», «Xocavəndin azad olunmasına görə», «Füzulinin azad olunmasına görə» medalları ilə təltif edilib.
