Orta təhsilinə indiki Kəngərli rayonunun Qabıllı kənd məktəbindən başlayıb. İlk hərbi təhsilini 2009-2012-ci illərdə Naxçıvan şəhərindəki  Heydər Əliyev adına Hərbi Liseydə alıb. 2012-2016-cı illərdə paytaxtdakı Heydər Əliyev adına Azərbaycan Ali Hərbi Məktəbdə hərb sənətinin dərinliklərinə yiyələnib. 2016-cı ildə leytenant  rütbəsi alaraq Goranboyda “N” saylı hərbi hissədə tağım komandiri vəzifəsində xidmətə başlayıb.




2017-ci ildə Tərtər rayonunda xidmətini davam etdirib. 2019-cu ildə ordu komandanlığı tərəfindən göstərdiyi xidmətləri nəzərə alaraq Baş Leytenant rütbəsi verilib. və bölük komandiri vəzifəsinə təyin edilib. Xidməti dövründə komandanlıq tərəfindən 3 dəfə fəxri fərmanla mükafatlandırılıb. 3 oktyabrda şəhid olan Həmid Qasımov Kəngərli rayon Qabıllı kənd məzarlığında dəfn edilib. Nişanlı idi.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Həmid Qasımov ölümündən sonra "Vətən uğrunda" medalı, Azərbaycan Respublikası ərazilərinin işğaldan azad olunması zamanı döyüş tapşırıqlarını yerinə yetirərkən şəxsi mərdlik və igidlik göstərdiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən “İgidliyə görə” medalı , Azərbaycanın Laçın rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən  “Laçının azad olunmasına görə” medalı ilə təltif edilib.


 

 

memorial.az