Nuruyev Cavid Əşirəf oğlu 1998-ci il mart ayının 3-də Naxçıvan Muxtar Respublikası Şərur rayonunun Oğuz kəndində anadan olub.

2005-2011-ci illərdə Oğuz kənd orta məktəbində orta təhsil alır. 2011-ci ildən Naxçıvan şəhərindəki Heydər Əliyev adına hərbi liseyə daxil olub. 2015-ci ildə hərbi liseydən məzun olan Cavid Nuruyev Bakıdakı Heydər Əliyev adına Azərbaycan Ali Hərbi Məktəbinə qəbul olur. 2019-cu ildə isə Heydər Əliyev adına Azərbaycan Ali Hərbi məktəbini müvəffəqiyyətlə başa vuraraq leytenant hərbi rütbəsi alır. “N” saylı hərbi hissəyə təyinat alan Cavid Əşrəf oğlu 2020-ci ilin əvvəllərində göstərdiyi döyüş bacarıqlarına görə hərbi hissə rəhbərliyi tərəfindən Fəxri fərmanla təltif olunub. 

27 sentyabr 2020-ci ildə başlanan İkinci Qarabağ Savaşının iştirakçısı olan leytenant Nuruyev Murovdağ silsiləsi, Suqovuşan, Ağdərənin bəzi yüksəkliklərinin alınması uğrunda ən qızğın döyüşlərdə iştirak edir. Oktyabrın 15-i tarixində bu istiqamətdə də qəhrəmancasına vuruşaraq şəhidlik zirvəsinə ucalıb.

30 noyabr 2020-ci il tarixində Şərur rayonun Şəhidlər Xiyabanında dəfn edilib.

Azərbaycan Respublikasının ərazi bütövlüyünün bərpa edilməsi zamanı döyüş əməliyyatlarına yüksək peşəkarlıqla rəhbərlik etdiyinə, düşmənin canlı qüvvəsinin və döyüş texnikasının məhv edilməsində fədakarlıq və rəşadət göstərdiyinə, vəzifə borcunu ləyaqətlə və vicdanla yerinə yetirdiyinə görə Azərbaycan Prezidenti İlham Əliyevin 15.12.2020-ci il tarixli Sərəncamına əsasən Cavid Nuruyev ölümündən sonra 3-cü dərəcəli “Vətənə xidmətə görə” və "Suqovuşanın azad olunmasına görə" medalları təltif edilib.