Ailəyə bağlı uşaq olub. Bacılarını daha çox istəyən igidimiz həmişə onları qorumağa çalışıb. Qohumcanlı olub. 2009-cu ildə 1ci sinifə gedib. Oxumaqla heç arası olmasa da məktəbdə, sinif tədbirlərində çox fəal uşaq olub. Hər kəsə kömək etməyi sevən Ülvi bir tək “çox sağ ol” kəlməsinə belə çox sevinər, özünü xoşbəxt hiss edərdi. 2017-ci ildə isə Abşeron rayonu Məhəmmədli kənd tam orta məktəbinin 9-cu sinfini bitirib, imtahanlarda balı az olduğundan məktəbdən xaric olunub.

Əsgərliyə getmək üçün tələsən qəhrəmanımız iyulda yaşını tamamlayıb ayın 23-ü Vətənə borcunu vermək üçün hərbi xidmətə yola düşür. Ucaboylu olduğundan Xüsusi Təyinatlılar dəstəsinə düşən Ülvi çox sevinir. Cəmi 72 gün əsgərlikdə olsa da ailəsi ilə tez-tez əlaqə saxlayıb. Onları nigaran qoymayıb. Hətta 27 sentyabrda başlayan ikinci Qarabağ müharibəsinə könüllü qatılan da belə ailəsinə deməyib ki, narahat olmasınlar. Anası Ülvinin Şəhid olduğu xəbərini alanda bilib ki, oğlu döyüş bölgəsində düşmənlərə qan uddurur.

Ülvi Rəhimov oktyabrın 4-ü Füzulidə yaralanaraq hospitala gətirilsə də həyatını xilas etmək mümkün olmayıb. Qəhrəmanımız oktyabrın 5-i şəhidlik zirvəsinə ucalıb. Oktyabrın 6-sı isə doğulub, böyüdüyü Abşeron rayonu Məmmədli kəndində torpağa tapşırılıb.

Azərbaycan ərazilərinin işğaldan azad olunması zamanı döyüş tapşırıqlarını uğurla yerinə yetirdiyinə, düşmənin əsas qruplaşmalarının məhv edilməsi ilə qoşunların döyüş qabiliyyətinin qorunub saxlanılmasında fərqləndiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Ülvi Rəhimov ölümündən sonra "Cəsur döyüşçü" medalı ilə təltif edildi.

Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Ülvi Rəhimov ölümündən sonra "Cəbrayılın azad olunmasına görə" medalı ilə təltif edildi.