Rəfiyev Ülvi Rəfail oğlu 1996 - cı il 16 avqust tarixində Ordubad rayonunda anadan olmuşdur.

2002 – ci il Bakı şəhər Xətai rayonu 263 saylı tam orta məktəbin 1-ci sinfinə getmiş, 2013 – cü ildə həmin məktəbi bitirmişdir. Elə həmin Azərbaycan Dövlət Neft və Sənaye  Universitetinin “İqtisadiyyat və menecment” fakültəsinin “Sənayenin təşkili və idarə olunması” ixtisasında təhsil almışdır.

Rəfiyev Ülvi professional olaraq rəqslə məşğul olurdu. 2015-ci il Bakı Avropa oyunlarının açılış mərasimində, 2017-ci il Univisionda, 2017-ci il Bakı İslam Oyunlarında (Pro cast dancer) və 2017-ci il Formula 1 -in açılış mərasimində rəqqas kimi iştirak etmişdir. Eyni zamanda xarici ölkələrdə də açılış mərasimlərində və tədbirlərdə iştirak etmişdir.

2017-ci ildə universiteti bitirdikdən Vətənin müdafiəsinə yollanıb və 2018-ci il tarixində hərbi xidmətini başa vurub.

İkinci Qarabağ savaşı başlayanda könüllü olaraq Vətənin müdafiəsinə qoşulub, 2020-ci ilin 25 oktyabr tarixində Qarabağ uğrunda gedən müharibədə qəhrəmancasına şəhidlik zirvəsinə ucalmışdır. Suraxanı rayonundakı “Dədə Qorqud” qəbirstanlığında dəfn olunub. Nişanlı idi. 

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Ülvi Rəfiyev ölümündən sonra "Vətən uğrunda" medalı ilə təltif edildi.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Ülvi Rəfiyev ölümündən sonra "Xocavəndin azad olunmasına görə" medalı ilə təltif edildi.