2007-2008-ci illərdə C.Naxçıvanski adına hərbi liseyə daxil olan Cavid Səfərli  2010-cu ildə liseyi bitirərək Heydər Əliyev adına Azərbaycan Ali Hərbi Məktəbinə  (AAHM) qəbul olur. 2014-cü ildə AAHM-i bitirir, 2014-2015-ci illərdə isə Təlim-Tədris mərkəzində (TTM-də) təhsilini davam etdirir. 2016-cı ildə Bakı şəhəri Müşfiqabad qəsəbəsində yerləşən 4-cü ordu korpusunun "N" saylı motoatıcı briqadasında bölük komandir kimi fəaliyyətə başlayıb. 2017-ci ildə Baş Leytenant rütbəsi alır. 2018-ci ildən Qusarda yerləşən "N" saylı hərbi hissədə komandir kimi işləyir. 2020-ci ildə Tabor komandiri müavini vəzifəsində çalışmağa başlayır.

Azərbaycan Ordusunun baş leytenantı Cavid Səfərli 2020-ci il sentyabrın 27-dən Azərbaycan Silahlı Qüvvələri tərəfindən ərazilərimizin erməni qəsbkarlarından təmizlənməsi uğrunda apardığı Vətən müharibəsində iştirak edib. Füzuli, Cəbrayıl, və Hadrut döyüşlərində vuruşur. Cavid Səfərli 20 oktyabr 2020-ci ildə Qubadlının azad edilməsi uğrunda gedən döyüşlərdə döyüş tapşırığını yerinə yetirərkən şəhid olub.
Bir aya yaxın müddətdə itkin olaraq axtarılan Cavid Səfərlinin nəşi noyabr ayında tapılaraq noyabrın 17-də Ana torpağa tapşırılır.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən baş leytenant Cavid Səfərli ölümündən sonra "Vətən uğrunda", İgidliyə görə", "Xocavəndin azad olunmasına görə" və "Füzulinin azad olunmasına görə" medalları ilə təltif edilib.