|
Aqil Məcidov 2020-ci ildən Azərbaycan Silahlı Qüvvələrinin sıralarında xidmət edirdi. Azərbaycan Ordusunun leytenantı olan Aqil Məcidov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Aqil Məcidov sentyabrın 28-də Füzuli döyüşləri zamanı şəhid olub. Tovuzda dəfn olunub.
Arzusu torpaqlarımızı işğaldan azad etmək və həyatı boyu bu şanlı tarixdən ağız dolusu danışmaq idi leytenant Aqil Məcidovun...
Arzusu və istəyi ilə Heydər Əliyev adına Ali Hərbi məktəbə daxil olub. Leytenant rütbəsi alan Aqilin növbəti istəyi düşmənlə üz-üzə xidmət etmək idi. Müharibənin başlayacağından xəbərsiz olan leytenant Aqil Məcidov hər gün sosial şəbəkələrdə "Əmr et torpaqlarımızı geri alaq, cənab Ali Baş Komandan" çağırışları edirmiş.
22 yaşlı şəhidimiz Füzuli istiqamətində gedən döyüşlərdə düşmənin birinci müdafiə xəttini yarıb, istehkamlarını məhv edib və ağır zərbələr endirib. Aqil arzu edirmiş ki, müddətli hərbi xidmətdə olan əkiz qardaşı Azadla çiyin-çiyinə döyüşsün. Sən demə çiyin-çiyinə olmasa da, eyni cəbhədə döyüşüblər. O, şəhid olmazdan əvvəl ailəsinə zəng edib, hər kəslə halallaşıb.
Anası Hicran Məcidova bildirir ki, övladı "ağlamayın, başınızı dik tutub, məğrur dayanın" dedi.
Leytenant Aqil Məcidov öz adını Vətən müharibəsi tarixinə silinməyəcək hərflərlə yazdı. Onun yoxluğu nə qədər ağır olsa da, bir o qədər də fəxr və qürur verir. Şəhidimiz doğulub boya -başa çatdığı Tovuz rayonunda dəfn edilib.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Aqil Məcidov ölümündən sonra "Vətən uğrunda" medalı ilə təltif edilib.
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Aqil Məcidov ölümündən sonra "Füzulinin azad olunmasına görə" medalı ilə təltif edildi.
Təltifləri
(15.12.2020) — "Vətən uğrunda" medalı (ölümündən sonra)
(25.12.2020) — "Füzulinin azad olunmasına görə" medalı (ölümündən sonra)
