Məmmədov Ürfan Çingiz oğlu 2000-ci ildə Quba rayonu Çartəpə kənd ümumi orta məktəbin 1-ci sinfinə daxil olub, 2009-cu ildə həmin məktəbin 9-cu sinfini bitirərək həmin ilin sentyabrında Quba rayonu Nəsib Dadaşov adına Aşağı Xuc kənd tam orta məktəbində 10-cu sinifə davam edib. 2011-ci il ildə Quba rayonu Nəsib Dadaşov adına Aşağı Xuc kənd tam orta məktəbinin 11-ci sinfini bitirərək məzun olub. Ürfan ailənin ortancıl uşağı idi. Onun 1 bacısı və 1 qardaşı var.

2011-ci il iyul ayının 20-də müddətli həqiqi hərbi xidmətə yollanıb. Cəlilabad və Lənkəran N saylı hərbi hissəsində xidmət edən Ürfan 2013-cü il yanvar ayında hərbi xidmətini başa vurub. Müddətli həqiqi hərbi xidmət keçdiyi dövrdə Xüsusi Təyinatlı Qüvvələrin kurslarına yazılıb, bəzi səbəblərdən xidmətini Xüsusi Təyinatlı Qüvvələrində davam etdirə bilməyib. Müddətli həqiqi hərbi xidmətdən qayıtdıqdan bir neçə il sonra 2017-ci ilin may ayında gizirlik kurslarına yazılıb. 1 ay kurs keçdikdən sonra imtahan verib imtahanı uğurla keçdikdən sonra Hərbi Xidmətinə Mingəçevir N saylı hərbi hissəsində gizir kimi davam edib.

2020-ci sentyabr ayının 27-dən vətən müharibəsinin ilk günündən bu döyüşlərdə iştirak edib. 28 sentyabr saat 12-radələrində sonuncu dəfə ailəsi ilə danışıb və qardaşından halallıq istəyib. 28 sentyabr saat 15:00 radələrində Talış kənddə düşmən postunda yemək yeyərkən döyüş yoldaşları ilə birlikdə düşmən pusqusuna düşüblər. Kürəyindən aldığı qəlpə yarasına baxmayaraq, bir neçə saat qəhrəmancasına döyüşüb. Döyüş yoldaşından sursat almaq istəyən zaman düşmən snayperinə tuş gəlib. Boyun nahiyəsindən aldığı güllə yarasından şəhid olub. Sentyabr ayının 30-da yaşadığı Quba rayonu Çartəpə kəndində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən Ürfan Məmmədov ölümündən sonra " Vətən uğrunda" , "Cəsur döyüşçü", "Suqovuşanın azad olunmasına görə" medalları ilə təltif edilib.