Bu torpaq, yurd üçün canını, qanını əsirgəməyən qəhrəman döyüşçülərimizdən biri də Teymurlu Mirrahil Ramiz oğludur. O, 16 oktyabr 1991-ci ildə Füzuli rayon Mahmudlu-1 kəndində anadan olub. Cümşüd Naxçıvanski adına hərbi liseyi bitirib. 2010-ci ildə Azərbaycan Silahlı Qüvvələrinə müddətli həqiqi hərbi xidmətə çağırılıb. 2012-cu ildə xidmətini uğurla başa vurub.
2013-cü ildə Azərbaycan Respublikası Ərazilərin minalardan təmizlənməsi üzrə Milli Agentlik təşkilatının minaaxtarma vəzifəsində işə başlayıb. 2018-ci ildə müddətdən artıq xidmət edən hərbi qulluqçu kimi tank bölüyünün baş mexanik sürücüsü olaraq xidmət göstərib.
Mirrahil Füzuli rayonu ərazisində hərbi əməliyyatlar zamanı döyüş meydanında xidməti vəzifələrinin icrası zamanı döyüş tapşırığını yerinə yetirərkən düşmən tərəfindən odlu silahdan açlan atəş nəticəsində şəhid olub.
Ölümündən sonra "Vətən uğrunda” "Füzulinin azad olunmasına görə", "Xocavəndin azad olunmasına görə", "Cəsur döyüşçü" medalları ilə təltif edilib.
