Məmmədov Sahil Rasim oğlu 07 iyun 1995-ci ildə Naxçıvan şəhər Qaraçuq qəsəbəsində anadan olub. 2001-2005-ci illərdə Qaraçuq kənd orta məktəbində, 2005-2009 Heydər Əliyev adına tam orta məktəbdə təhsil alıb. 2009-2012-ci illərdə Heydər Əliyev adına Hərbi liseyə daxil olub. 2012-2016-cı illərdə Azərbaycan Ali Hərbi Məktəbində təhsilini davam etdirib.

2016-cı ildə həmin məktəbi "motoatıcı" ixtisası üzrə bitirib. 2016 cı il iyulun 4-də Müdafiə Nazirinin müvafiq əmrinə əsasən xidmətini davam etdirmək üçün  Şəmkir korpusunun snayper bölüyündə bölük komandirinin müavini,  2019-cu ilin mart ayında N saylı hərbi hissədə Həmlə taborunda taqım komandiri vəzifəsində xidmət edib. Tovuz döyüşlərində və Il Qarabağ müharibəsində iştirak edib.

Murovdağ silsiləsinin düşməndən təmizlənməsində xüsusi fəallıq göstərib. 28 sentyabr 2020-ci il tarixində qəhrəmancasına şəhid olub. 07 dekabr 2020-ci ildə doğulduğu kəndin qəbristanlığında dəfn olunub. Ailəli idi, 1 qız övladı yadigar qalıb.
Döyüş hazırlığındakı nailiyyətləri və xidmətdə fərqləndiyinə görə bir çox fəxri fərmanlarla təltif olunub.

  “Azərbaycan Silahlı Qüvvələrinin 95 illiyi”, "Azərbaycan Ordusunun 100 illiyi" , ölümündən sonra isə Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Sahil Məmmədov "Vətən uğrunda" medalı ilə təltif edilib.