Fərid Hamlet oğlu Əliyev 22 mart 2001-ci ildə İsmayıllı şəhəri Kürdmaşı kəndində anadan olub. 2007-2018-ci illərdə C.Həsənov adına Kürdmaşı kənd tam orta məktəbində oxuyub. 2018-ci ildə İsmayıllı Dövlət Humanitar və Texnologiya Kollecinin "Turizm və Onun Təşkili" ixtisasına qəbul olub. 2019-cu ildə təhsilinə fasilə verərək hərbi xidmətə yollanıb.
Azərbaycan Ordusunun əsgəri Fərid Əliyev Vətən müharibəsinə qatılaraq Füzuli uğrunda gedən döyüşlərdə qəhrəmancasına şəhid olub. Sentyabrın 28-də doğulduğu İsmayıllı rayonunun Kürdmaşı kəndində dəfn olunub.
Azərbaycanın Respublikasının ərazi bütövlüyünün bərpa edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin 15.12.2020-ci il tarixli Sərəncamına əsasən Fərid Əliyev ölümündən sonra "Vətən uğrunda" medalı ilə təltif edilib.
Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Fərid ölümündən sonra "Füzulinin azad olunmasına görə" medalı ilə də təltif edilib.
