Əsrlər keçəcək, amma Rəşadətli Ordumuzun hünəri, qəhrəman hərbçilərimizin şərəfli döyüş yolu haqqında dastanlar, hekayələr bitməyəcəkdir. Yenilməz Azərbaycan əsgəri xalqımızın milli ruhunu canlandırıb, həmrəyliyimizi daha da artırıb. Əyilməz iradəmiz, döyüşkən ruhumuz və həmrəyliyimiz qarşısında heç bir qüvvə tab gətirə bilməz.
Böyük Zəfəri xalqımıza daddıran, bizə sonsuz qürur və fəxr hissi bəxş edən igid hərbçilərimizdir. Vətən Müharibəsinin cəsur hərbçilərindən biri də Hüseynov Anar Rəhim oğludur. O, 9 yanvar 1997-ci ildə Tərtər rayonunda anadan olub. 2003-cü ildə 10 nömrəli sanatoriya tipli internat məktəbinə daxil olur və doqquz il sonra məzun adını qazanır.
2016-cı il aprelin 2-də Ermənistan silahlı qüvvələrinin təxribatlarına cavab olaraq, Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğradaraq, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad edir. Hüseynov Anar 4 günlük döyüşün iştirakçılarından biri olur.
Azərbaycanın tarixinə qızıl hərflərlə yazılan və torpaqlarımızın otuz illik işğaldan azad olunması ilə nəticələnən “Dəmir yumruq” əməliyyatında - 44 gün davam edən Vətən müharibəsində isı əzmlə vuruşur, böyük qəhrəmanlıq nümunələri göstərir. Səfərbərlik Xidməti tərəfindən müharibəyə cəlb edilən Anar 29.09.2020-ci ildə Ağdərə istiqamətində gedən döyüşlərdə qəhrəmancasına Şəhid olub
Azərbaycan Prezidenti İlham Əliyevin Sərəncamına əsasən Anar Hüseynov ölümündən sonra "Vətən uğrunda" medalı ilə təltif edilib.
