Vətən müharibəsində tarixi qəhrəmanlıqlara imza atan igid oğullarımızdan biri də Ruslan Elçin oğlu Yunislidir. O, 1996-ci ildə Beyləqan rayonunun Təzəkənd kəndində dünyaya göz açıb. Orta təhsilini başa vurduqdan sonra 2020-ci il sentyabrın 8-də həqiqi hərbi xidmətə çağırılıb.
Xidmət dövründə atıcı qumbaraatan köməkçisi olub. Ruslan Vətən müharibəsinin ilk günlərindən döyüşlərdə iştirak edib və oktyabrın 25-də Füzuli istiqamətində gedən döyüşlərdə qəhrəmancasına şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Ruslan Yunisli ölümündən sonra "Vətən uğrunda" medalı ilə təltif edilib.
Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Ruslan Yunisli ölümündən sonra "Cəbrayılın azad olunmasına görə" medalı ilə təltif edilib. Ruslan həmçinin "Cəbrayılın azad olunmasına görə" və "Cəsur döyüşçü" medalları ilə təltif olunub.
