Taleh Gündüz oğlu Yusifov 1994-cü il noyabrın 18-də Samux rayonunun Ziyadlı kəndində doğulub. 2001-ci ildə Samux rayon Ziyadlı kənd İmadəddin Nəsimi adına tam orta məktəbdə təhsil almağa başlayıb və 2012 - ci ildə məktəbi bitirib. 2013-cü il yanvar ayının 25-də hərbi xidmətə gedib. Xidmətini Naxçıvan Muxtar Respublikasının Kəngərli rayonunun Qıvraq qəsəbəsində yerinə yetirib. Sərrast atıcılıq qabiliyyəti olan Taleh snayperçi kimi hər zaman hədəfi dəqiq nişan almağı bacarırıb. 2014 - cü il iyul ayında xidmətini başa vurub və Samux rayonuna qayıdıb.
Vətən müharibəsi zamanı Cəbrayılın, Qubadlının və Laçının azadlığı uğrunda gedən döyüşlərdə iştirak edib və noyabrın 5-də Laçın döyüşləri zamanı şəhid olub. Ailəsi ilə son dəfə noyabrın 3-də danışan Talehdən ailəsi 2 həftə heç bir xəbər ala bilməyib. Günbəgün ümidləri üzülən doğmaların son ümidinə 26 noyabrda nöqtə qoyulub. Onun nəşi noyabrın 26-da ailəsinə verilib. Noyabrın 27-də isə kənd qəbirsanlığında canını qurban etdiyi torpağa tapşırılıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Taleh Yusifov ölümündən sonra "Vətən uğrunda" medalı ilə təltif edilib.
Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Taleh Yusifov ölümündən sonra "Cəbrayılın azad olunmasına görə" medalı ilə təltif edilib.
Azərbaycanın Qubadlı rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Taleh Yusifov ölümündən sonra "Qubadlının azad olunmasına görə" medalı ilə təltif edilib.
Azərbaycanın Laçın rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Taleh Yusifov ölümündən sonra "Laçının azad olunmasına görə" medalı ilə təltif edilib.
Azərbaycan ərazilərinin işğaldan azad olunması zamanı döyüş tapşırıqlarını və xidməti vəzifələrini yerinə yetirən zaman fərqləndiyinə görə Azərbaycan Prezidenti İlham Əliyevin 30.12.2020-ci il tarixli Sərəncamına əsasən Taleh Yusifov ölümündən sonra "Hərbi xidmətlərə görə" medalı ilə təltif edilib.
