İki dəfə Sovet İttifaqı Qəhərmanı olan yeganə azərbaycanlı Həzi Aslanovun davamçısı Orxan Eminalıyev... Onun şərəfinə seçmişdi "dəmir at"-ı. Heç kimə demədən döyüşə qatılıb. Bir neçə dəfə tankı vurulsa da, yenə də döyüşməyə davam edib. "Dəmir at"-lı cəngavər düşmənin xeyli sayda canlı qüvvəsini və hərbi texnikasını məhv edib.
Orxan Eyvaz oğlu Eminalıyev 5 noyabr 1994-cü ildə Tovuz rayonunun Aşağı Mülkülü kəndində anadan olub. 2001–2012-ci illərdə Aşağı Mülkülü kənd tam orta məktəbində, 2013–2017-ci illərdə isə Heydər Əliyev adına Azərbaycan Ali Hərbi Məktəbində (AAHM) təhsil alıb.
Orxan 2017-ci ildə "leytenant" hərbi rütbəsi altında Azərbaycan Silahlı Qüvvələrinin sıralarında xidmətə başlayıb. 2019-cu ildən xidmətini "baş leytenant" rütbəsilə davam etdirib.
2020-ci il sentyabrında başlayan Vətən müharibəsində Füzuli, Cəbrayıl və Qubadlı rayonlarının azadlığı uğrunda tankçı kimi canla-başla iştirak edib. Oktyabrın 25-da Qubadlı döyüşləri zamanı Orxanın idarə etdiyi tank vurulub və o, qanitirmədən şəhidliyə yüksəlib. Doğulduğu Tovuz rayonu Aşağı Mülkülü kəndində dəfn edilib.
Azərbaycan Respublikasının Prezidenti İlham Əliyevin Sərəncamına əsasən, şəhidimiz ölümündən sonra “Vətən uğrunda”, "Qubadlının azad olunmasına görə" medalları ilə təltif edilib.
