Rafael Əliyev Oruc oğlu 1984-cü il mayın 24-də Horadiz şəhərində anadan olub. 1991-2002-ci illərdə Horadiz şəhəri 2 nömrəli tam orta məktəbdə təhsil alıb. Məktəb dövründə idmanın karate növü ilə məşğul olan Rafael diplom və sertifikatlara layiq görülüb. O, 2002-2004-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Qayıtdıqdan sonra bir müddət mülki işlərdə çalışsa da Rafaelin daxilindəki vətənpərvərlik hissi onu 2016-cı ildən müddətdən artıq həqiqi hərbi xidmət qulluqçusu olaraq kəşfiyyatçı kimi fəaliyyətini davam etdirməyə sövq edib. Şəhidimizin 15 illik ailə həyatından 2 qız övladı Vətənə əmanət qalıb.
Orduda çavuş olan Əliyev Azərbaycanın ərazi bütövlüyünün bərpa edilməsi uğrunda gedən döyüşlərdə savaşıb. O, sentyabrın 28-də Füzuli döyüşləri zamanı şəhid olub, Horadizdə dəfn edilib.
Rafael sentyabrın 28-də sonuncu dəfə qardaşıyla telefonda danışıb. Hər şeyin yaxşı olduğunu deyən Rafael, Qarabağı azad edəcəklərini bildirib...
Rəfail Əliyev döyüşlərdə göstərdiyi şücaətə görə ölümündən sonra "Vətən uğrunda", "Cəsur döyüşçü", "Füzulinin azad olunmasına görə", "Şuşanın azad olunmasına görə", "Xocavəndin azad olunmasına görə" medalları ilə təltif edilib. Rəfail Əliyevin təltif edildiyi Şuşanın azad olunmasına görə medalı isə övladına təqdim olunub.
Qeyd edək ki, şəhid Rəfail Əliyevin iki qız övladı yadigar qalıb.
