Nurlan Madər oğlu Hüseynov 1992-ci il iyulun 3-də İmişli rayonunun Göbəktala kəndində anadan olub. 2011-ci ildən Azərbaycan Silahlı Qüvvələrin də xidmət etməyə başlayıb. 2018-ci ildə Türkiyənin İzmir şəhərin də keçirilən ən yaxşı snayperçi yarışında 24 dövlət arasında birinci yeri tutub.
Onun da sıralarında olduğu Xüsusi Təyinatlı Qüvvələrin hərbçiləri gördükləri işlərlə, qəhrəmanlıqlarla övünməzlər, ona görə də sağ ikən tanınmırlar. Yalnız şəhid və ya qazi olduqda onları xalq tanıyar. Elə Nurlan Hüseynov da 10 il xidmət etdiyi dövrdə bir kəlmə də olsun belə, öz şücaəti haqqında danışmadı. O, şəhid olduqdan sonra ailəsi Nurlanın igidliyi haqqında onun döyüşçü yoldaşlarından məlumat aldı.

Azərbaycan Ordusunun Xüsusi Təyinatlı Qüvvələrinin giziri olan Nurlan Hüseynov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün təmin olunması üçün başlanan Vətən Müharibəsi zamanı Murovdağının, Cəbrayılın, Füzulinin və Hadrut qəsəbəsinin azadlığı uğrunda gedən döyüşlərdə iştirak edib. .14.10.2020-ci il tarixində Füzuli rayonu ərazisində döyüş tapşırığını yerinə yetirərkən düşmən tərəfindən açılan atəş nəticəsində aldığı qəlpə yarasından şəhid olub.

Azərbaycan Prezidenti İlham Əliyevin Sərəncamına əsasən Nurlan Hüseynov ölümündən sonra bir sıra medallarla təltif edilib.

1.“Rəşadət” ordeni;
2.“Vətən uğrunda” medalı;
3.“Cəbrayılın azad olunmasına görə” medalı;
4.“Kəlbəcərin azad olunmasına görə” medalı;
5. “Vətən müharibəsi iştirakçısı” medalı.


Şəhidin qardaşı Sərdar Hüseynov qardaşı haqqında danışarkən dedi ki, Nurlan hələ uşaq ikən hərbçi olmaq arzusu ilə yaşayırdı. O, həqiqi hərbi xidmətdə olarkən Xüsusi Təyinatlı Qüvvələr tərəfindən seçilib. Nurlanın fiziki qabiliyyəti, bacarıqlı olması və ən əsası Vətənə bağlılığı onun xüsusi təyinatlı olması ilə nəticələndi. Xüsusi Təyinatlı Qüvvələrin sırasına qatılanda sevincinin həddi-hüdudu yox idi. Çünki arzusuna çatmışdı. O, Vətənə, dövlətə, bayrağa o qədər bağlı idi ki... Beləcə Nurlan 2010-cu ildən Azərbaycanın elit hərbçilərindən biri olaraq Vətənin keşiyində dayanır.

Onun işi əlbəttə çətin, amma bir o qədərdə şərəfli idi. Şəhid anası Səliqə Hüseynova hətta bir neçə dəfə Nurlana bu işdən uzaqlaşmağı tövsiyə eləyib. Lakin Nurlan "mən Vətən üçün doğulmuşam və hərbçi yoldaşlarımdan ayrıla bilmərəm" deyib.


Nurlan xidməti dövründə saymaqla bitməyən nailiyyətlərə imza atıb. Hələ Aprel döyüşlərində düşmənə vurulan ağır zərbələrdə Nurlanın şücaətləri olub.


Şəhidin qardaşı Sərdar Hüseynov söyləyir ki, Nurlan təkcə Aprel döyüşündə 57 ermənini əlbəyaxa döyüşdə məhv edib: "Baxmayaraq ki, həmin döyüşlərdə kəllə-beyin travması almışdı, müalicədən sonra da yenidən xidmətinə qayıtdı. Nurlan bir çox kurslar, təlimlər keçən xüsusi təyinatlı gizir idi. O, Türkiyədə 24 ölkə arasında snayper atışı üzrə yarışda 1-ci olub. Həmin zaman Nurlana "Qartal" ləqəbi və üzərində qartal simvolu olan üzük təqdim edilib. Vətən müharibəsində də ən öndə gedənlərdən biri olub. Nurlan 15 döyüşçü yoldaşı ilə 1500 erməni hərbçisini qovan bir qəhrəman olub. Hətta bunu erməni tərəfi ağlayaraq etiraf edib. Nurlan və qrupu Vətən müharibəsində düşmənə, sözün əsl mənasında qan uddurub".


Qəhrəmanımızın ilk döyüş yolu Murov yüksəkliyində olub, bir çox postların azad edilməsində şücaət göstərib. Cəbrayıl, Zəngilan, Suqovuşan, Füzuli istiqamətlərində döyüş tapşırıqlarını da uğurla yerinə yetirib. Onlarla erməni postunu ələ keçiriblər və artilleriya bölmələrini məhv ediblər. Hadrut istiqamətində gedən döyüşlərdə Nurlan və qrupu düşmən tərəfinə sızma tapşırığını yerinə yetirib, ermənilərin BMP-sini qənimət olaraq götürüblər. Yenidən həmin BMP ilə düşmənə qarşı hücuma keçərkən ermənilər tərəfindən atılan raketlə BMP vurulub. Oktyabrın 14-də Nurlan şəhidlik zirvəsinə ucalıb.


Şəhidin qardaşı deyir ki, Nurlan döyüşlərdə 400-500 ermənini məhv edib. "Qardaşımın şəhid olmasına sevinirəm, çünki bunu özü istəyirdi və söyləyirdi ki, Vətənimin azadlığı üçün son qanıma qədər döyüşəcəyəm. Belə də etdi, o, sağ ikən də qəhrəmanlığı ilə yaddaşlarda qalmışdı və qəhrəmancasına da şəhid oldu", - deyə Sərdar söyləyir.


Nurlan Hüseynovun xatirələrini atası Madər Hüseynov bir qəhrəmanlıq tarixi olaraq yaddaşına həkk edib. Şəhid atası övladı haqqında fikirlərini bu sözlərə ifadə edib: "Belə bir övlad yetişdirdiyim üçün çox qürurluyam. Mən özüm də Vətənimə bağlıyam və övladlarıma bu tərbiyəni vermişəm. Nurlan ən çox arzuladığı şəhidlik zirvəsinə ucalmaqla məni də qürurlandırdı, mən də özümü şəhid atası kimi zirvədə hiss edirəm".


Şəhidimiz ata-baba yurdu olan İmişlinin Göbəktala kəndində dəfn edilib. Ölümündən sonra "Vətən uğrunda" medalı ilə təltif olunub.